इजरायलको हवाई आक्रमणले लगभग ५० प्रतिशत भौतिक पूर्वाधार ध्वस्त भइसकेको गाजास्ट्रिपमा विश्वका धनाढ्य व्यक्ति एलन मस्कले इन्टरनेट सेवा दिने घोषणा गरेका छन् ।

गत अक्टोबर ७ मा हमासले हजारौँ रकेटहरू प्रहार गर्दै इजरायलविरुद्ध आक्रमण सुरु गरेको थियो । अमेरिकाको समर्थन पाएको इजरायलले त्यसपछि यस्तो घातक हमला थालेको छ, जसले गाजामा विकराल अवस्था निम्तिएको छ ।

इजरायलले घेराबन्दी नै गरेर त्यहाँ खाद्यवस्तु, औषधि, खाने पानी साथै इन्टरनेटमा प्रतिबन्ध लगाएपछि त्यहाँको अवस्था नाजुक बन्दै गइरहेको छ । अन्तर्राष्ट्रिय एजेन्सीहरूले इजिप्ट हुँदै गाजामा मानवीय सहायताका सामग्रीहरू पठाउन सुरु गरेका छन् ।

तर, पूर्वाधारहरूमा ठूलो क्षति हुँदा र इन्टरनेट बन्द हुँदा गाजाबाट अन्तर्राष्ट्रिय एजेन्सीका स्वयंसेवकहरूले सञ्चार गर्न पाइरहेका छैनन् । यस्तोमा सामाजिक सञ्जाल ट्विटर, स्पेस एक्स, टेस्लाका मालिक मस्कले त्यहाँ नि:शुल्क इन्टरनेट सेवा दिने वाचा गरेका छन् ।

हाल पृथ्वीका कक्षहरूमा मस्कका ५ हजार स्टारलिंक स्याटेलाइटहरू तैनाथ छन्, जसले ६० भन्दा बढी देशमा इन्टरनेट सेवा दिइरहेको छ । यस्तोमा गाजामा पनि मानवीय सहायताका लागि इन्टरनेट दिने मस्कको भनाइ छ । यसअघि रुसले युक्रेनमा आक्रमण थाल्दा त्यहाँ पनि इन्टरनेट सेवा प्रभावित हुँदा मस्कले नै स्याटेलाइटमार्फत युक्रेनमा इन्टरनेट सेवा दिएका थिए ।

तर, मस्कको घोषणाबाट इजरायल भने खुसी छैन । इजरायलले स्टारलिंक इन्टरनेट सुविधा गाजामा दिइँदा त्यसले हमासलाई फाइदा पुग्ने बताएको छ । इन्टरनेट सुविधा हमासको पहुँचमा गए झनै आतंकवादी गतिविधि बढ्ने इजरालको भनाइ छ । उसले गाजाभित्र इन्टरनेट सुविधा रोक्न आफूले सक्दो प्रयत्न गर्ने भन्दै मस्कको विरोध जनाएको छ ।

यसअघि मस्कले हालै गाजाका २२ लाख जनसंख्यालाई इन्टरनेट र सञ्चारको पहुँचबाट वञ्चित गरिनु अन्याय हुने भन्दै पत्रकार, स्वास्थ्यकर्मी र मानवअधिकारकर्मीको हितका लागि भए पनि त्यहाँ इन्टरनेट सेवा दिइनुपर्ने बताएका थिए ।

गत हप्ताको शुक्रबार राति इजरायलले हमासका १५० स्थानमा घातक आक्रमण गर्दा त्यही आक्रमणले गाजाको इन्टरनेट प्रणालीमा ठूलो क्षति पुगेको बताइएको छ । सोमबारसम्मको तथ्यांकअनुसार इजरायलको जवाफी कारबाहीमा गाजामा ८ हजार ५ प्यालेस्टाइनीले ज्यान गुमाएका छन् । यस्तै, हमासको कारबाहीमा इजरायलमा १४ सयले ज्यान गुमाएका छन् ।