सार्वजनिक लेखा समितिले आफनो २१औँ वार्षिक प्रतिवेदन पारित गरेको छ । सभापति भरतकुमार शाहले प्रस्तुत गर्नुभएको वार्षिक प्रतिवेदन समितिको आजको बैठकले सर्वसम्मतिले पारित गरेको हो । समितिले वर्षभरि गरेको काम कारबाहीको वार्षिक प्रतिवेदन सदनमा पेस गर्ने उद्देश्यले तयार गरिएको मस्यौदा प्रतिवेदनमाथि छलफल भइ पारित भएको समिति सचिव डा.रोजनाथ पाण्डले जानकारी दिए । उनले भने, ’बेरुजु फर्स्योट गर्ने सन्दर्भमा गठन भएका नौ उपसमितिले गरेका काम प्रतिवेदनमा समावेश छ, समसामयिक निर्णय, राष्ट्रिय गौरवका आयोजनाको निरीक्षणपछि तयार गरिएको अध्ययन प्रतिवेदनलाई पनि समेटिएको छ ।’
मन्त्रालय र केन्द्रीय निकायमा रहेको बेरुजु किनारा लगाउन गरिएको प्रयास, बेरुजुका सम्बन्धमा उठेका विषय, असुल उपर गर्नुपर्ने रकम, आर्थिकरूपले वित्तीय व्यवस्थापनका सवालमा नीतिगत निर्णय गर्न चालिनु पर्ने कदमकासहितका सुझाव प्रतिवेदनमा समावेश छ।